പാലാ: പാലാ–തൊടുപുഴ സംസ്ഥാന പാതയിൽ പയപ്പാർ വളവിൽ ഇറച്ചിക്കോഴികളുമായി പോയ ലോറി നിയന്ത്രണം വിട്ട് റോഡിലേക്ക് മറിഞ്ഞു.അപകടത്തെത്തുടർന്ന് ലോറിയിലുണ്ടായിരുന്ന നൂറുകണക്കിന് കോഴികളും കൂടുകളും റോഡിലേക്ക് ചിതറിവീണു. വാഹനത്തിന്റെ മുൻഭാഗം തകർന്നെങ്കിലും ഡ്രൈവറും സഹായിയും നിസാര പരിക്കുകളോടെ രക്ഷപ്പെട്ടു. ഇവരെ സമീപത്തെ പ്രാഥമിക ആരോഗ്യകേന്ദ്രത്തിൽ പ്രവേശിപ്പിച്ചു.സ്ഥിരം അപകടമേഖലയായ പയപ്പാർ കൊടുംവളവിൽ നിയന്ത്രണം നഷ്ടപ്പെട്ടതാണ് അപകടത്തിന് കാരണമായതെന്നാണ് പ്രാഥമിക നിഗമനം. റോഡിലേക്ക് കോഴികളും കൂടുകളും വീണുകിടന്നതിനെ തുടർന്ന് ഇതുവഴിയുള്ള വാഹനഗതാഗതം ഭാഗികമായി തടസ്സപ്പെട്ടു.സംഭവസ്ഥലത്തെത്തിയ പോലീസും അഗ്നിരക്ഷാ സേനയും നാട്ടുകാരും ചേർന്ന് റോഡിലെ അവശിഷ്ടങ്ങൾ നീക്കം ചെയ്യാനും ഗതാഗതം പുനഃസ്ഥാപിക്കാനുമുള്ള നടപടികൾ പുരോഗമിക്കുകയാണ്. റോഡിൽ എണ്ണ പടർന്നിരിക്കാൻ സാധ്യതയുള്ളതിനാൽ ഇരുചക്രവാഹനങ്ങൾ ഉൾപ്പെടെയുള്ളവ ജാഗ്രത പാലിക്കണമെന്ന് പോലീസ് നിർദ്ദേശിച്ചു.
