കോട്ടയം: വർഷങ്ങളായി അനിശ്ചിതത്വത്തിലായിരുന്ന കോട്ടയം നഗരത്തിലെ ആകാശപ്പാത (Skywalk) പദ്ധതിക്ക് വീണ്ടും ജീവൻ വെയ്ക്കുന്നു. ആകാശപ്പാതയുടെ അവശേഷിക്കുന്ന നിർമ്മാണ പ്രവർത്തനങ്ങൾ വരും 18 മാസത്തിനുള്ളിൽ പൂർത്തിയാക്കുമെന്ന് നിയമസഭാ സ്പീക്കർ അറിയിച്ചു. വർഷങ്ങളായി പാതിവഴിയിൽ നിലച്ച നിർമ്മാണത്തെ തുടർന്ന് ഉയർന്ന ജനകീയ പ്രതിഷേധങ്ങളും ചർച്ചകളും പരിഗണിച്ചാണ് പദ്ധതി യുദ്ധകാലാടിസ്ഥാനത്തിൽ പൂർത്തീകരിക്കാനുള്ള നിർദ്ദേശം നൽകിയിരിക്കുന്നത്. പദ്ധതി യാഥാർത്ഥ്യമാകുന്നതോടെ കോട്ടയം നഗരത്തിലെ ഗതാഗതക്കുരുക്കിന് വലിയൊരു പരിധി വരെ ആശ്വാസമാകുമെന്നും കാൽനടയാത്രക്കാർക്ക് സുരക്ഷിതമായ സഞ്ചാരപാതയൊരുങ്ങുമെന്നും വിലയിരുത്തപ്പെടുന്നു.
