കൊച്ചി: കൊച്ചി ശാസ്ത്ര സാങ്കേതിക സർവകലാശാലയിൽ (കുസാറ്റ്) വിദ്യാർഥികൾക്കിടയിൽ ചിക്കൻപോക്‌സ് പടർന്നുപിടിക്കുന്നതായി റിപ്പോർട്ട്. രോഗവ്യാപന ഭീതിയെത്തുടർന്ന് സ്കൂൾ ഓഫ് എൻജിനീയറിങ് വിഭാഗത്തിലെ അധ്യയനം പൂർണമായും ഓൺലൈൻ രീതിയിലേക്ക് മാറ്റാൻ അധികൃതർ തീരുമാനിച്ചു. ക്യാമ്പസിലെ നിരവധി വിദ്യാർഥികളിൽ രോഗലക്ഷണങ്ങൾ കണ്ടെത്തിയതിനെ തുടർന്നാണ് മുൻകരുതൽ നടപടിയുടെ ഭാഗമായി ഓഫ്‌ലൈൻ ക്ലാസുകൾ താൽക്കാലികമായി നിർത്തിവെച്ചത്. ഹോസ്റ്റലുകളിലും ഡിപ്പാർട്ട്‌മെന്റുകളിലും രോഗം കൂടുതൽ പേരിലേക്ക് പകരുന്നത് തടയാൻ ആരോഗ്യവകുപ്പിന്റെ നിർദേശങ്ങൾ കർശനമായി പാലിക്കണമെന്ന് സർവകലാശാല അധികൃതർ അറിയിച്ചു. രോഗബാധിതരായ വിദ്യാർഥികൾ നിരീക്ഷണത്തിൽ കഴിയാനും മതിയായ വിശ്രമവും ചികിത്സയും ഉറപ്പാക്കാനും നിർദേശം നൽകിയിട്ടുണ്ട്.
