കോൺഗ്രസ് വിമത കൗൺസിലർമാരുടെയും എൽ.ഡി.എഫ് അംഗങ്ങളുടെയും പിന്തുണയോടെ മായാ രാഹുൽ പാലാ നഗരസഭയുടെ പുതിയ ചെയർപേഴ്സണായി തെരഞ്ഞെടുക്കപ്പെട്ടു. നഗരസഭയിലെ രാഷ്ട്രീയ സമവാക്യങ്ങളിൽ നിർണായക മാറ്റത്തിനാണ് പുതിയ തെരഞ്ഞെടുപ്പ് വഴിയൊരുക്കിയത്. സ്വതന്ത്ര കൗൺസിലറായ മായാ രാഹുലിനെ ചെയർപേഴ്സൺ സ്ഥാനത്തേക്ക് പിന്തുണയ്ക്കാൻ എൽ.ഡി.എഫും കോൺഗ്രസ് വിമതരും നേരത്തെ ധാരണയിലെത്തിയിരുന്നു. 26 അംഗ കൗൺസിലിലാണ് പുതിയ ഭരണസമവാക്യം രൂപപ്പെട്ടത്. മുൻ ചെയർപേഴ്സൺ ദിയ ബിനു പുളിക്കകണ്ടത്തിനെതിരായ അവിശ്വാസ പ്രമേയം വിജയിച്ചതിനെ തുടർന്നാണ് പുതിയ ചെയർപേഴ്സൺ തെരഞ്ഞെടുപ്പ് നടന്നത്. പാലാ നഗരസഭയിലെ പുതിയ രാഷ്ട്രീയ കൂട്ടുകെട്ട് വരും ദിവസങ്ങളിൽ നഗരസഭാ ഭരണത്തിൽ നിർണായകമാകുമെന്നാണ് വിലയിരുത്തൽ.
