ഇഎംഐയിൽ വാങ്ങിയ മൊബൈൽ ഫോൺ ഉൾപ്പെടെയുള്ള ഇലക്ട്രോണിക് ഉപകരണങ്ങളുടെ ലോൺ തിരിച്ചടവ് മുടങ്ങിയാൽ ഉപകരണത്തിന്റെ ചില പ്രവർത്തനങ്ങൾ നിയന്ത്രിക്കുന്നതിനുള്ള വ്യവസ്ഥകൾ ആർബിഐയുടെ പുതിയ ചട്ടങ്ങളിൽ ഉൾപ്പെടുത്തിയിട്ടുണ്ട്. എന്നാൽ ഏതെങ്കിലും സാധാരണ വായ്പയുടെ ഇഎംഐ മുടങ്ങിയെന്ന കാരണത്താൽ ബാങ്കുകൾക്ക് ഉപഭോക്താവിന്റെ സ്വന്തം ഫോൺ ഇഷ്ടാനുസരണം ലോക്ക് ചെയ്യാമെന്നല്ല ഇതിന്റെ അർഥം. പ്രത്യേകിച്ച് ഫോൺ, ടാബ്ലെറ്റ്, ലാപ്ടോപ്പ് തുടങ്ങിയ ഉപകരണങ്ങൾ വാങ്ങുന്നതിനായി എടുത്ത ഉപകരണ-ബന്ധിത വായ്പകളിലാണ് നിയന്ത്രണങ്ങൾ ബാധകമാകുന്നത്. പുതിയ ചട്ടങ്ങൾ ഉപഭോക്താക്കളുടെ സ്വകാര്യ ഡാറ്റ സംരക്ഷിക്കുന്നതിനും പ്രാധാന്യം നൽകുന്നു. വായ്പ തിരിച്ചടവ് വൈകിയാലും വ്യക്തിഗത വിവരങ്ങളിലേക്കോ ഫോണിലെ സ്വകാര്യ ഡാറ്റയിലേക്കോ അനധികൃതമായി പ്രവേശിക്കാൻ വായ്പദാതാവിന് കഴിയില്ല. കുടിശ്ശിക അടച്ചതിന് ശേഷം നിയന്ത്രിച്ച പ്രവർത്തനങ്ങൾ വേഗത്തിൽ പുനഃസ്ഥാപിക്കണമെന്നും നിർദേശമുണ്ട്. അതേസമയം, പുതിയ ചട്ടങ്ങൾ 2027 ജനുവരി 1 മുതൽ പ്രാബല്യത്തിൽ വരുമെന്നാണ് റിപ്പോർട്ടുകൾ. വായ്പാ തിരിച്ചടവ് സംബന്ധിച്ചുള്ള റിക്കവറി നടപടികളിൽ ഉപഭോക്താക്കളെ ഉപദ്രവിക്കുന്ന രീതികൾക്കും നിയന്ത്രണമുണ്ട്.
