കേന്ദ്ര സർക്കാർ നൽകിയ ഉറപ്പുകൾ പാലിച്ചില്ലെന്ന് ആരോപിച്ച് സിജെപി വീണ്ടും സമരമുഖത്തേക്ക്. സെപ്റ്റംബർ 5ന് ഡൽഹിയിൽ പ്രതിഷേധ മാർച്ച് നടത്തുമെന്ന് സിജെപി പ്രഖ്യാപിച്ചു. ഇന്ത്യാ ഗേറ്റിൽ നിന്ന് പുതിയ ഡൽഹി പൊലീസ് ആസ്ഥാനത്തേക്കാണ് മാർച്ച് നടത്തുക.
ജൂലൈ 25ന് യുവാക്കളുമായുണ്ടായ ധാരണയുടെ അടിസ്ഥാനത്തിൽ നേരത്തെ നിർത്തിവച്ച പ്രതിഷേധം വീണ്ടും ശക്തമാക്കുന്നതിന്റെ ഭാഗമായാണ് പുതിയ സമരപരിപാടിയെന്ന് സിജെപി അറിയിച്ചു. വിദ്യാർഥികൾക്കെതിരായ എഫ്ഐആറുകൾ പിൻവലിക്കൽ ഉൾപ്പെടെയുള്ള ആവശ്യങ്ങളിൽ സർക്കാർ നടപടി സ്വീകരിച്ചിട്ടില്ലെന്നാണ് സംഘടനയുടെ ആരോപണം.
മരിച്ച NEET വിദ്യാർഥികളുടെ കുടുംബങ്ങളും പൊലീസിന്റെ നടപടിയിൽ ദുരിതമനുഭവിച്ചവരും മാർച്ചിന് നേതൃത്വം നൽകുമെന്ന് സിജെപി അറിയിച്ചു. രാജ്യത്തിന്റെ വിവിധ ഭാഗങ്ങളിൽ നിന്നുള്ള വിദ്യാർഥികളും യുവജന സംഘടനകളും യുവാക്കളും പ്രതിഷേധത്തിൽ പങ്കെടുക്കുമെന്ന് സംഘടന വ്യക്തമാക്കി.
‘വാക്ക് പാലിക്കുക’ എന്ന ആവശ്യം ഉയർത്തിയാണ് പ്രതിഷേധം. സെപ്റ്റംബർ 5ന് നടക്കുന്ന മാർച്ച് കേന്ദ്ര സർക്കാരിന് പുതിയ രാഷ്ട്രീയ സമ്മർദമായി മാറുമോ എന്നതാണ് ഇനി ശ്രദ്ധേയം.
