ഇന്ത്യ-ചൈന അതിർത്തി പ്രശ്നത്തിൽ അതിർത്തി പുനർനിർണയം സംബന്ധിച്ച ചർച്ചകൾ നടന്നതായി ബീജിംഗിലെ ഇന്ത്യൻ എംബസി സ്ഥിരീകരിച്ചു. ദേശീയ സുരക്ഷാ ഉപദേഷ്ടാവ് അജിത് ഡോവലും ചൈനീസ് വിദേശകാര്യ മന്ത്രി വാങ് യിയും തമ്മിൽ നടന്ന ചർച്ചയിലാണ് അതിർത്തി പുനർനിർണയവുമായി ബന്ധപ്പെട്ട വിഷയങ്ങൾ പരിഗണിച്ചത്.
ഇരു രാജ്യങ്ങളും തമ്മിലുള്ള 25-ാമത് സ്പെഷ്യൽ റെപ്രസന്റേറ്റീവ്സ് ചർച്ച ഓഗസ്റ്റ് 25ന് ബീജിംഗിലാണ് നടന്നത്. ഉഭയകക്ഷി സഹകരണം കൂടുതൽ ശക്തമാക്കുക, അതിർത്തി മേഖലയിൽ സമാധാനവും സ്ഥിരതയും ഉറപ്പാക്കുക, അതിർത്തി പുനർനിർണയത്തിൽ പുരോഗതി കൈവരിക്കുക തുടങ്ങിയ വിഷയങ്ങൾ ചർച്ചയായതായി ഇന്ത്യൻ എംബസി അറിയിച്ചു.
അതേസമയം, അതിർത്തി തർക്കത്തിന് ഉടൻ പരിഹാരം ഉണ്ടായെന്നല്ല ഈ ചർച്ചകൾ സൂചിപ്പിക്കുന്നത്. അന്തിമ അതിർത്തി നിർണയത്തിനായി ദീർഘകാല ചർച്ചകളും ഇരു രാജ്യങ്ങളുടെയും ധാരണയും ആവശ്യമാണ്. ചൈനയും ന്യായവും പരസ്പരം അംഗീകരിക്കാവുന്നതുമായ രാഷ്ട്രീയ പരിഹാരം തേടാനുള്ള ശ്രമം തുടരണമെന്ന് വ്യക്തമാക്കിയിട്ടുണ്ട്.
അതിർത്തിയിലെ സമാധാനവും സ്ഥിരതയും നിലനിർത്തുന്നതിനൊപ്പം അതിർത്തി പ്രശ്നത്തിന് രാഷ്ട്രീയ പരിഹാരം കണ്ടെത്താനുള്ള ചർച്ചകൾ മുന്നോട്ട് കൊണ്ടുപോകുകയാണ് ഇരു രാജ്യങ്ങളുടെയും ലക്ഷ്യം.
