രാഷ്ട്രപതി ദ്രൗപദി മുർമുവിന്റെ മുൻ എയ്ഡ്-ഡി-ക്യാമ്പായി പ്രവർത്തിച്ച് സമൂഹമാധ്യമങ്ങളിൽ ശ്രദ്ധ നേടിയ മേജർ റിഷഭ് സിങ് സാംബ്യാൽ ഇന്ത്യൻ സൈന്യത്തിൽ നിന്ന് സ്വയം വിരമിച്ചു. 12 വർഷത്തെ സൈനിക സേവനത്തിന് ശേഷമാണ് മുപ്പതുകാരനായ മേജർ റിഷഭ് സാംബ്യാൽ സൈനിക ജീവിതത്തോട് വിടപറഞ്ഞത്. സൈനിക സേവനത്തിനിടെ രാജ്യശ്രദ്ധ നേടിയ വ്യക്തിത്വമായിരുന്നു അദ്ദേഹം. രാഷ്ട്രപതിയുടെ എയ്ഡ്-ഡി-ക്യാമ്പായി പ്രവർത്തിച്ച കാലയളവിലെ ചിത്രങ്ങളും വീഡിയോകളും സമൂഹമാധ്യമങ്ങളിൽ വലിയ ശ്രദ്ധ നേടിയിരുന്നു. അപ്രതീക്ഷിതമായ വിരമിക്കൽ തീരുമാനത്തെക്കുറിച്ച് പ്രതികരിച്ച അദ്ദേഹം, ചില കുടുംബപരമായ ഉത്തരവാദിത്തങ്ങൾ നിറവേറ്റുന്നതിനായാണ് പുതിയ തീരുമാനമെടുത്തതെന്ന് വ്യക്തമാക്കി. ജീവിതത്തിലെ ഏറ്റവും കഠിനവും വേദനാജനകവുമായ തീരുമാനമാണിതെന്നും അദ്ദേഹം പറഞ്ഞു. രാജ്യസേവനത്തിനായി സമർപ്പിച്ച 12 വർഷത്തെ സൈനിക ജീവിതത്തിന് ശേഷമാണ് റിഷഭ് സാംബ്യാൽ പുതിയ ജീവിതഘട്ടത്തിലേക്ക് കടക്കുന്നത്. അദ്ദേഹത്തിന്റെ വിരമിക്കൽ വാർത്ത സമൂഹമാധ്യമങ്ങളിലും വലിയ ചർച്ചയായിരിക്കുകയാണ്.
