പാലാ നഗരസഭാ ചെയർപേഴ്സൺ സ്ഥാനത്തേക്ക് മായാ രാഹുലിനെ സ്ഥാനാർഥിയാക്കാൻ തീരുമാനം. വിമത കൗൺസിലർമാരുടെ യോഗത്തിലാണ് മായാ രാഹുലിനെ ചെയർപേഴ്സൺ സ്ഥാനാർഥിയായി തീരുമാനിച്ചതെന്നാണ് റിപ്പോർട്ട്. 26 അംഗങ്ങളുള്ള പാലാ നഗരസഭാ കൗൺസിലിൽ 17 പേരുടെ പിന്തുണ മായാ രാഹുലിന് ലഭിക്കുമെന്നാണ് സൂചന. നഗരസഭാ ചെയർപേഴ്സൺ തെരഞ്ഞെടുപ്പ് ഈ മാസം 19ന് നടക്കും.പാലാ നഗരസഭയിലെ 19-ാം വാർഡിനെ പ്രതിനിധീകരിക്കുന്ന മായാ രാഹുൽ രണ്ടാം ടേമിലും കൗൺസിലറായി വിജയിച്ച വ്യക്തിയാണ്. നിലവിലെ രാഷ്ട്രീയ സാഹചര്യത്തിലാണ് ചെയർപേഴ്സൺ സ്ഥാനത്തേക്ക് മായാ രാഹുലിന്റെ പേര് ഉയർന്നത്.യുഡിഎഫ് നഗരസഭാധ്യക്ഷയായിരുന്ന ദിയ ബിനു പുളിക്കക്കണ്ടം എൽഡിഎഫ് കൊണ്ടുവന്ന അവിശ്വാസ പ്രമേയത്തെ തുടർന്ന് സ്ഥാനത്ത് നിന്ന് പുറത്തായ സാഹചര്യത്തിലാണ് പുതിയ ചെയർപേഴ്സൺ തെരഞ്ഞെടുപ്പ് നടക്കുന്നത്. കോൺഗ്രസിലെ നാല് കൗൺസിലർമാരുടെയും നഗരസഭ ഉപാധ്യക്ഷയായ സ്വതന്ത്ര കൗൺസിലറുടെയും പിന്തുണ ലഭിച്ചതോടെയാണ് എൽഡിഎഫിന്റെ അവിശ്വാസ പ്രമേയം പാസായതെന്നാണ് റിപ്പോർട്ട്.ഇതോടെ പാലാ നഗരസഭയിലെ അധികാര സമവാക്യങ്ങളിൽ ശ്രദ്ധേയമായ മാറ്റമാണ് ഉണ്ടായിരിക്കുന്നത്. 19ന് നടക്കുന്ന ചെയർപേഴ്സൺ തെരഞ്ഞെടുപ്പോടെ മായാ രാഹുലിന്റെ സ്ഥാനാരോഹണം ഔദ്യോഗികമാകുമോ എന്നതാണ് ഇനി ശ്രദ്ധേയം.
